Në ceremoni të varrimit kanë marrë pjesë familjarë e të afërm të viktimës por edhe përfaqësues të institucioneve qeveritare e komunale.
E ndjera Hamide Magashi dyshohet se u vra me plumb në kokë pasditen e së mërkurës derisa po qëndronte para Klinikës së Gjinekologjisë në QKUK, ku ishte shtrirë për ta sjellur në jetë foshnjën e saj një ditë më vonë.
Sipas dyshimeve të para të institucioneve të sigurisë, i dyshuar për vrasjen e saj është ish bashkëshorti S.H. me të cilin tashmë e ndjera ishte në proces të shkurorëzimit.
Sipas Prokurorisë Themelore në Ferizaj, e ndjera kishte urdhër mbrojtës nga Gjykata Themelore në Ferizaj i cili vente deri në muajin mars të vitit 2023 për shkak të kërcënimeve të vazhdueshme që i kishte marrë nga tashmë i dyshuari për vrasjen e saj, S.H.
Familjarët e të ndjerës një ditë më herët kanë deklaruar për teve1 se e ndjera ishte rrahur dhe dhunuar shpeshherë nga ish bashkëshorti i saj dhe se për këto vepra ishte në dijeni edhe Policia e Kosovës.
Në ceremoni të varrimit u pa edhe ministrja e Drejtësisë, Albulena Haxhiu dhe kryetari i Komunës së Lipjanit, Imri Ahmeti.
