Krasniqi doli nga kjo mbledhje pasi që deputeti i PDK-së, Hajdar Beqa, i tha se është në “agjendë të shitblerjes së energjisë” për interesat personale të tij.
“E konstatojmë që menaxhmenti akutal, kryeshefi, nuk përgjigjet në pyetje, nuk ka vizion si me e shti në funksion Bllokun A5, nuk ka vizion për me gjeneru mjaftueshëm për Bllokun B2 dhe nuk ka agjendë sepse është në agjendë të shitblerjes së energjisë elektrike për interesa personale të tij dhe raporti do të shkojë në prokurori”, tha deputeti Beqa.
Pas kësaj deklarate të Beqës, Krasniqi tha se kjo është shpifje dhe e lëshoi mbledhjen.
Pas tij mbledhjen e Komisionit e lëshuan edhe deputetët e Vetëvendosjes, Armend Muja, Halil Thaçi dhe Arbër Rexha.
Debati në mbledhje filloi qysh në fillim kur deputeti i PDK-së, Hajdar Beqa, e pyeti Krasniqin pse nuk është në punë Blloku A5.
“Po shohim që kemi pas reduktime edhe të verës po ashtu në krize energjetike, pse nuk është njësia A5 në punë? Është e papërgjegjshme nga një menaxhment që ende nuk e ka fut në funksion një bllok. Unë e di që ju e keni emëru po duhet me u pergjigj” – tha deputeti Beqa.
“Veç me e ditë që a përfshihet në hetime edhe koha aktuale. Unë këtu kam ardhur të përgjigjem prej 2006 deri 2022 .Unë i përgjigjem vetëm Bordit askujt tjetër, mos më ndërpre” – tha Krasniqi.
Komisioni hetimor për energji ka nisur punën pas krizës energjetike në Kosovë.
