Fejza deklaroi se largimi i tyre nga këto institucione ka qenë një vendim politik, mirëpo me vullnet të tyre.
“Çështja e largimit të tyre nga institucionet e Kosovës ka qenë një vendim politik, të cilët ata e kanë marrë individualisht. Në rastet kur japin dorëheqje nga secili institucion, ne duhet të shohim se cilat janë procedurat që duhet të ndiqen pastaj dhe në rastin e Kuvendit ka qenë të zëvendësohen”, tha Fejza në emisionin “Ditari” në tëvë1.
Se a do jetë e vështirë të bindet pakica serbe që të vijnë persona të rinj në pozitat e tyre që u takojnë në institucionet e sigurisë dhe të drejtësisë, Fejza tha se nuk do jetë aspak e vështirë, pasi siç tha ajo, çdo rekrutim ligjor do jetë në përputhje me ligjin në fuqi.
Ndërkaq, e pyetur se a do ketë hapësirë për tensione të ndryshme, Fejza tha se në kushte normale nuk do duhej të kishte, pasi sipas saj, kjo situatë ka të bëjë zbatim të ligjit.
“Dorëheqja fundja ka qenë vullnet me të cilën është bërë nga ana e serbëve. Nuk ka pasur asnjë lloj nxitje, madje edhe kryeministri Kurti u është lutur që të mos japin dorëheqje”, theksoi Fejza tutje.
Paralajmërimet e Listës Serbe për largim nga institucionet e Kosovës kanë ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq i cili pati deklaruar se nuk e repsketon vendimin e Qeverisë për targat ilegale të lëshuara nga Serbia./teve1.info/.
