Dialogu mbi një dekadë mes Kosovës dhe Serbisë për normalizim të marrëdhënieve, ka pasur mungesën e kornizës kohore.
Këtë javë për herë të parë filluan të përmenden data se kur ky proces mund të marr fund.
Kryeministri i vendit Albin Kurti deklaroi se Bashkimi Evropian, ka propozuar fundin e shkurtit ose fillimin e marsit për një gjë të tillë.
Nga pozita afatizimin e cilësojnë si një element shumë të rëndësishëm drejtë normalizimit.
“Është afatizimi i këtij procesi, që është mëse e domosdoshme në veçanti për shumë procese tjera në të cilat po kalon Republika e Kosovës, domosdoshmërinë e ngritjes së subjektivitetit ndërkombëtar dhe natyrisht funksionalizimin e mirëfilltë të të gjitha elementeve të shtetësisë në raport me marrëdhëniet ndërkombëtare … për ne është e domosdoshme që ky proces të mbahet në dinamikën aktive në të cilën ka filluar dhe natyrisht afati i pranverës së vitit 2023 të jetë afati i finalizimit të një afati të gjatë, apo arritjes së marrëveshjes finale për normalizim në mes të dy shteteve”, ka thënë Shefja e GP të VV-së, Mimoza Kusari.
Nga Partia Demokratike e Kosovës thonë se e rëndësishme është që marrëveshja të arrihet brenda vitit 2023.
“Nuk mendoj që marsi mund të jetë datë fikse, çka jam i sigurt që mund të ndodh është që, nëse kryeministri Kurti e ka përnjëmend dialogun, i beson procesit dhe ka koordinim me partnerët tanë amerikan dhe evropian, mund të krijohet një momentum i ri, për një marrëveshje për njohje të ndërsjellë, dhe a arrihet kjo në mars apo arrihet në qershor nuk besoj që është relevante. Çka është relevante, është që të jetë në vitin 2023”, ka deklaruar Enver Hoxhaj nga PDK-ja.
Ndërsa nga Aleanca për Ardhmërinë e Kosovës, thonë se kryesore në këtë fazë është që marrëveshja të përmbyllet me vulën amerikane.
“Afatet kohore janë pak problematike të thuhet, ka d.m.th jemi kthy mbrapa me vendimin e fundit të kryeministrit Kurti. Mirëpo, fokusi duhet të jetë sa më shpejtë mirëpo në lidershipin amerikan. Rezoluta e AAK-së është e qartë ku flet për ftesën e një samiti amerikan i cili do të përmbyll këtë çështje një herë e përgjithmonë”, është shprehur Besnik Tahiri nga AAK.
Korniza kohore për dialogun ishte ajo që pamundësoi arritjen e një ujdie mes palëve të hënën e 21 nëntorit në Bruksel.
Kronika e realizuar nga gazetari Valmir Gallopeni.
