KB Peja ka triumfuar bindshëm ndaj Kamzës në kuadër të Ligës Unike. Ndeshja e xhiros së parë, që u luajt të mërkurën mbrëma në palestrën “Dhimitraq Goga” në Durrës, përfundoi me shifrat 98:74 në të mirë të Pejës.
Për Pejën, kjo ishte ndeshja e dytë këtë edicion në Ligën Unike pasi të parën e humbi javën e shkuar në shtëpi nga Ponte Prizreni. Peja është kampione në fuqi e kësaj gare, dhe për asnjë moment nuk lejoi të befasohet nga Kamza pasi gjatë tërë kohës ishte në epërsi.
Më efikasi në triumfin e Pejës ndaj Kamës ishin amerikanët Rodney Purvis e Isiah Umpipig, që shënuan nga 16 pikë secili.
Te Peja, me pikë dyshifrore ndeshjen e mbyllën edhe Brad Waldow (15) e Lajen Tate (13). Ndërsa, te Kamza u veçua Xander Bowers me “double-double” prej 21 pikëve e 12 kërcimeve. Në kuadër të xhiros së parë, do të luhet edhe një ndeshje tjetër.
Në Shqipëri, Ponte Prizreni do të përballet me Apolloninë, të enjten prej orës 17:00. Ndërkohë, dy duelet tjera që ishin të parapara të luhen në Kosovë, ai mes Golden Eagle Yllit e Tiranës dhe Trepçës me Teutën, janë anuluar. Ishin skuadrat nga Shqipëria që kanë kërkuar një gjë të tillë për shkak të raporteve të këqija që i kanë me drejtuesit e Federatës Shqiptare të Basketbollit (FSHB).
