Tahiri ka thënë se si AAK kanë marrë vendim që të prezantojnë një amendament, i cili sipas tij lidhet drejtpërdrejt në nevojën për ngritje lineare të pagave, raporton Teve1.info
“Ne si AAK kemi marrë vendim që të prezantojmë një amendament në këtë buxhet, amendamnet i cili lidhet drejtpërdrejt për nevojën për ngritje lineare të pagave të zyrtarëve publik në të gjitha nivelet, 30%, përveç deputetëve, ministrave dhe anëtarëve të kabinetit, tjerët pa dallim të kenë ngritje të pagave, duke përfshirë sektorin e shëndetësisë, e arsimit në veçanti sektorin e sigurisë, policisë dhe ushtrisë”, ka deklaruar ai.
Ai shton se sot dhe nesër do të kenë konsultime me ekspert të brendshëm dhe sindikata për të folur për ligjin për Paga.
“Për të adresuar një ndër ligjet më kryesore për këtë vit, atë të buxhetit për vitin 2023. Sot dhe nesër do të kemi disa konsultime me ekspert të brendshëm edhe me sindikata për të adresuar së paku dy çështje me rëndësi. Qeveria e Kosovës i ka gënjyer të gjithë zyrtarët publik, duke iu thënë se do të sjell ligjin e pagave të cilin nuk e ka sjellë dhe mbi të gjitha duke e mos vendosur në buxhet vijën e cila do të futet në zbatim këtë vit ligjin dhe vlerën e koeficientit. E kanë luajtur një lojë shumë të ulët”, tha Tahiri.
Po ashtu, edhe deputeti Pal Lekaj ka thënë se përmes këtij amendamenti kërkojnë që 30 % të rriten pagat e çdo zyrtari publik.
Sipas tij, Qeveria ka mashtruar qytetarët dhe zyrtarët publik, nuk i’u ka përmbajtur premtimit dhe rezolutës që vetë e kanë përkrahur për Ligjin e Pagave.
“Nuk ka ngritje të pagave për punëtorët shëndetësorë, për mjekët, për infermierët. Nuk ka ngrije të pagave në arsim, nuk ka ngritje të pagave për pensionistët, nuk ka ngritje të pagave as për invalidët. Prandaj ne pas një analize analitike buxhetore jemi dakorduar që ne të bëjmë mes dy leximeve një amandament që të kërkojmë që 30% të rriten pagat e çdo zyrtari publik”, deklaroi Lekaj. /Teve1.info/
