Ujkani në emisionin “Ditari” në tëvë1 tha se si deputete deri më tani ende nuk ka pranuar një draft të planit franko-gjerman për ta parë, por sipas saj, e rëndësishme është që ai paraqet një bazë të mirë dhe se Qeveria e Kosovës tashmë ka dhënë komentet e saj.
“Deri më tani nuk na ka ardhur si deputetë të Republikës së Kosovës, plani franko-gjerman… Plani fanko-gjerman paraqet një bazë të mirë dhe neve na jep një shtysë të mirë që të dialogojmë mbi atë plan. Ne kemi dërguar komentet tona për atë plan… Është tejet e rëndësishme që mos të dalim me deklarata që e dëmtojnë këtë proces”, tha ajo.
E pyetur se a u ka shkuar plani deputetëve të partisë që është në pushtet, Ujkani tha se nuk ka mundësi të bëhen dallime të tilla ndërmjet deputetëve të mazhorancës dhe opozitës.
Sipas Ujkanit të gjithë deputetët pa dallim duhet së bashku ta trajnojnë një plan të tillë të rëndësishëm.
“Nuk ka këso dallime sepse ne pa dallim të gjithë jemi deputetë të Republikës së Kosovës dhe në këto çështje nuk ka ndarje nëse jemi deputetë të mazhornacës apo të opozitës sepse ne duhet që bashkërisht ta trajtojmë një plan tejet të rëndësishëm sepse kjo nuk i shërben askujt që të trajtohet në mënyrë të njëanshme”, deklaroi ajo.
Më tej Ujkani theksoi se Qeveria Kurti është e fokusuar te plani franko-gjerman pasi që thotë se përbënë një bazë të mirë
“Unë besoj që ky plan është tejet konfidencial dhe njëherë duhet të diskutohet në mes palëve të cilat janë të autorizuara që të dialogojnë dhe të shohin se cilat janë mundësitë që të përfitojnë secila nga palët e tyre”, shtoi Ujkani./Teve1.info/
