Osmani ka thënë se sot është dëshmuar se “ne gjithmonë qëndrojmë të bashkuar dhe në anën e drejtë të historisë”.
“Sot, Kuvendi i Kosovës foli me një zë. U dëshmua se përballë hegjemonive që cenojnë liritë më fundamentale njerëzore e që shkelin të drejtën e një populli për të jetuar i lirë, sovran e në përputhje me vlerat demokratike, ne gjithmonë qëndrojmë të bashkuar dhe në anën e drejtë të historisë. Falënderoj të gjithë deputetët të cilët e fuqizuan edhe mëtej qëndrimin tashmë të shprehur nga Kosova lidhur me dënimin e agresionit rus në Ukrainë, sanksionet ndaj Rusisë dhe hapjen e dyerve për refugjatët nga Ukraina”, ka shkruar Osmani.
“Kosova qëndron me Ukrainën, sepse Kosova qëndron në anën e lirisë!”, ka shtuar ajo.
Kuvendi i Kosovës përmes një rezolute të miratuar ka dënuar agresion rus në Ukrainë. 94 deputetë kanë votuar pro kësaj rezolute pa asnjë abstenim dhe asnjë kundër.
Para nisjes së seancës, deputetët kanë mbajtur pankarta në duart e tyre ku shihej flamuri i Ukrainës, në të cilat shkruhej “Ne qëndrojmë me ju”.
Deputetët e Listës Serbe kanë lëshuar sallën para votimit, ashtu siç nuk u ngritën në këmbë për një minutë heshtje në nderim të viktimave në Ukrainë. /Teve1.info/
