Dobra në emisionin “Ditari” në Tëvë1, tha se kjo marrëveshje do të ndihmojë në reformën e profesionalizimit të administratës publike, ku pikë nervore është përmirësimi i procesit të rekrutimit.
“Kjo marrëveshje do ta ndihmon në reformën që do jemi duke bërë e që konsiston në profesionalizimin e administratës publike. Pikë nervore e kësaj reforme është përmirësimi i procesit të rekrutimeve. Siç e dimë deri më tani edhe besimi i qytetarëve tek rekrutimet ka humbur”, ka deklaruar ai.
Ai po ashtu tregon se me këtë reformë do të digjitalizohet tërësisht sistemi i rekrutimeve.
“Me reformën që jemi duke bërë do të digjitalizohet tërësisht sistemi i rekrutimeve, pra testimi do të bëhet në kompjuter, do të bëhet në mënyrë anonime, pyetjet do të përzgjidhen përmes algoritmeve në momentin që ulen kandidatët për testim, pra nuk do të ketë mundësi që pyetjet do të rrjedhin përmes letrave apo telefonave. Ato pyetje do të përzgjidhen përmes algoritmeve nga një bankë pyetjesh që do t’i ketë disa mijëra pyetje do të përzgjidhen një numër i caktuar në momentin që hynë në testim. Nuk do të ketë mundësi që dikush të interferojë në atë proces. Ata që kalojnë testimin me shkrim futen në intervistë, prapë do të përdorim algoritma…”, tha më tej Dobra. /Teve1.info/
