Me këtë rast, Kurti ka thënë se veprimet e qeverisë janë në shërbim të sundimit të ligjit, si dhe që marrin parasysh brengat e partnerëve ndërkombëtarë për sigurinë dhe paqen.
Kurti ka theksuar se bojkoti i institucioneve nga Lista Serbe është i nxitur dhe orkestruar nga Beogradi. Ai po ashtu bëri të ditur se deri sot janë lëshuar një mijë e 12 qortime për vozitësit me targa ilegale.
“Ai i njoftoi emisarët për zbatimin e shkallëzuar të vendimit të qeverisë për targat ilegale duke theksuar se deri sot në mëngjes janë lëshuar 1012 vërejtje për vozitësit me targa ilegale dhe se pavarësisht kësaj nuk ka asnjë incident shënuar; për punën e institucioneve për mbarëvajtjen e shërbimeve për të gjithë qytetarët; dhe për kërcënimet dhe sulmet që individë dhe banda kriminale po u bëjnë qytetarëve tanë në komunat në veri të vendit”, ka thënë Kurti, bëhet e ditur në njoftimin për media.
Kreu i Ekzekutivit ka shtuar se Qeveria e Kosovës është qeveri demokratike dhe e përgjegjshme, e përkushtuar ndaj ligjshmërisë dhe kushtetuetshmërisë, respektimit të të drejtave dhe lirive të njeriut dhe pakicave, barazisë, shërbimit ndaj qytetarëve, paqes dhe sigurisë. /Teve1.info/
