Trepça ’89 ka marrë një fitore të rëndësishme në udhëtim te Drenica në kuadër të xhiros së 24-të të Superligës së Kosovës në futboll.
Të mërkurën, 89-shi ka mposhtur Drenicën me përmbysje të rezultatit për ta shënuar fitoren e dytë në pesë ndeshje të luajtura në stinorin pranveror. Në duelin e luajtur në stadiumin “Bajram Aliu” në Skenderaj, ndeshja u mbyll me shifrat 2:1 në favor të ekipit mysafir.
Në fakt, Drenica ishte ajo që zhbllokoi rezultatin e ndeshjes qysh në minutën e gjashtë, me supergolin e brazilianit Diego Armando Lopes da Silva.
Megjithatë, Trepça ’89 u kundërpërgjigj me dy gola, një në pjesën e parë dhe një në të dytën për ta fituar ndeshjen. Fillimisht, e barazoi rezultatin në minutën e 32-të, falë autogolit të kapitenit të Drenicës, Shkëlzen Lushtaku. Ndërsa, fitoren e shënoi me golin fantastik nga gjuajtja e lirë të shënuar nga Rilind Nimani në minutën e 55-të.
Me këtë fitore, Trepça ’89 ngrihet në kuotën e 24 pikëve, një më shumë se Drenica që bie në pozitën e fundit në tabelë.