Pretendimeve të Trumpit që Grenlanda duhet të jetë pjesë e ShBA-ve pasi “kjo është ajo që grenlandezët duan”, i janë përgjigjur qytetarët e vendit në një sondazh që u krye në Grenlandë ku doli se 85% e popullsisë e kundërshton idenë për t’u bërë pjesë e territorit amerikan, dhe vetëm 6% e mbështet atë.
Ky sondazh u krye nga firma e sondazheve Verian për gazeten kombëtare të Grenlandës Sermitsiaq dhe median daneze Berlingske, që vlerësoi opinionin e publikut në lidhje me deklaratat e presidentit amerikan që sygjerojnë se vendi i tij duhet të marr Grenlandën nga Danimarka, raporton AA.
Trump ka përsëritur disa herë gjatë fushatës, por edhe pas inaugurimit si president, duke shkruar në llogarinë e tij në Truth Social se ShBA duhet të kontrollojë Grenlandën, duke e quajtur pronësinë e saj “domosdoshmëri absolute”.
Këtë e ka përforcuar me pretendimin e tij se kjo është ajo që duan edhe të gjithë 57,000 banorët e Grenlandës.
Grenlanda gjendet nën sovranitetin danez që nga viti 1953, dhe ka tërhequr interesin e Trump për shkak të pozitës strategjike gjeografike dhe burimeve të mëdha minerale me të cilat është e pasur.
Trump fillimisht hodhi idenë e blerjes së Grenlandës gjatë mandatit të tij të parë në detyrë, një ide që Danimarka e hodhi poshtë plotësisht. Megjithatë, kthimi i tij në Shtëpinë e Bardhë ka ringjallur frikën e një shtytjeje më agresive për të siguruar kontrollin mbi ishullin.
