Dy javët e fundit të muajit prill u përmbyllën me paraqitjen e 8 rasteve të fruthit.
E për këtë arsye, Instituti Kombëtar i Shëndetësisë Publike të Kosovës doli me një apel.
Të gjithë fëmijët që nuk kanë marr vaksinën MMR, duhet të vaksionohen.
“Duke marrë parasysh natyrën shumë ngjitëse të fruthit dhe rrezikun për përhapje të mëtejshme, IKSHPK u bën thirrje urgjente prindërve që të kontrollojnë kartelën e vaksinimit të fëmijëve të tyre dhe t’i vaksinojnë fëmijët në qendrën më të afërt të Mjekësisë familjare në komunën përkatëse”, thuhet në njoftimin e IKSHPK-së.
Vatra nga ku vijnë këto tetë raste rezulton të jetë Ferizaj.
E madje njëri prej rasteve ndodhet edhe në gjendje të rëndë.
“Ne sot kemi situatën kur na është paraqitur një vatër në Ferizaj, prej ku vijnë diku nja tetë raste të cilat janë të spitalizuara. Fatkeqësisht, njëri prej tyre është në gjendje të rëndë shëndetësore, praktikisht është dërguar mbrëmë në Klinikën e Pediatrisë dhe më duket që është i intubuar, pra për shkak të insuficiencës respiratore. Dhe njëkohësisht janë dy raste të tjera të cilat janë në proces të verifikimit, pra mund të jenë edhe ato dy që kanë të bëjnë me frukth”, u shpreh Infektologu.
Po cilat në fakt janë simptomat e fruthit?
“Karakterizohet me simptomatologji të përgjithshme dhe lokale. Simptomatologjia e përgjithshme nënkupton me temperaturë, ethe, lodhje, molisje dhe njëkohësisht me ndërlikime në mushkëri e më vonë edhe në sistemin nervor qendror”, theksoj Infektologu
Për të parandaluar përhapjen e saj, Dreshaj ka një mesazh për prindrit, por edhe shtetin.
“Vaksinoni që të siguroni veten dhe fëmijët. Pasojat e fruthit të rëndë nëse prekin sistemin nervor janë pasoja shumë të rënda dhe kjo nuk guxon të ndodhë, nuk lejohet, nuk duhet. Dhe në këto raste, sëmundjet të cilat kanë obligim vaksinimi, shteti duhet të veprojë. Ata të cilët nuk i dërgojnë fëmijët në vaksinim, shteti duhet t’i ndëshkojë. Ka ndëshkuar përpara, duhet të ndëshkojë, sepse rrezikohet shëndeti i të gjithë mbarësisë”, ka përfunduar Infektologu.
Ndonëse kjo sëmundje është më e shfaqur te fëmijët, sipas infektologut, mund të kalohet relativisht lehtë.
Por, nëse ndërlikohet, atëherë ndërlikimet shpeshherë mund të jenë edhe të rënda, e ndonjëherë edhe fatale.
