Qendra Komunale e Numërimit në Mitrovicën e Jugut ka konstatuar 75 fletëvotime me problematika të numrit serik, të cilat tashmë janë dorëzuar te organet e drejtësisë.
Lajmin e ka bërë të ditur kryesuesi i KKZ-së në Mitrovicë të Jugut, Bajram Hajdari.
“Procesi i verifikimit të fletëvotimeve ka përfunduar në orën 14:00. Tash jemi duke bërë përgatitjen për bartjen e materialit në QNR në Fushë Kosovë. Sipas një verifikimi paraprak, janë 75 fletëvotime për ato që po pyetni ju. Janë të të dy kandidatëve. Ato, me kërkesë të policisë, i kemi bërë kopje dhe i kemi dorëzuar dhe tani janë organet tjera”, tha Hajdari.
Ai gjithashtu tha se nuk ka njohuri nëse ndonjëra nga këto fletëvotime ka qenë e pavulosur:
“Unë nuk kam informacion nëse ndonjëra nga këto fletëvotime ka qenë e pavulosur,” shtoi ai.
Ky proces vjen pas shqetësimeve për integritetin e procesit zgjedhor në disa vendvotime të Mitrovicës së Jugut, ku janë konstatuar defekte të fletëvotimeve dhe probleme me numrat serik.
