Selvishahe Mehmeti nga Tetova po kërkon drejtësi në Kosovë, pasi që thotë se ish-dhëndri bashkë me një person tjetër ia morën me dokumente të falsifikuara pronën në vlerë prej një milion euro.
Erdhi nga Tetova për ta parë tokën e saj që e ka në pronësi në Fushë-Kosovë.
Selvishahe Mehmeti ka disa muaj që për këtë pronë, po kërkon drejtësi pasi pretendon se ajo iu morr kundërligjshëm nga ish-dhëndri i saj bashkë me një person tjetër nga Vushtrria.
Për këtë, vendim mori edhe Gjykata e Apelit që propozoi caktimin e masës së sigurisë deri në një vendim tjetër.
Por, tashmë blerësi i kësaj prone ka filluar punimet për ndërtimin në këtë parcelë në fshatin Nakaradë.
Derisa 70-vjeçarja kërkon që drejtësia të vije në vend, dhe prona t’i kthehet asaj pasi që i ka të gjitha dokumentet.
“Pres drejtësi, drejtësi vetëm drejtësi, jam në drejt të zotit, në rrugë të zotit, edhe eci përpara. A këtë kush e ka bërë, inshaAllah Zoti na ndihmon neve atyre ua shtoftë atë që e kanë bërë s’mundem me thënë, vetëm drejtësia le të ecë përpara”, tha Selvishahe Mehmeti.
Ajo tregon se edhe autoritetet maqedonase e kanë konfirmuar që e njëjta është përfituar me dokumente të falsifikuara.
E pyetur nga tëvë1 se a janë në dijeni që po punohet në këtë pronë, Gjykata e Apelit ka treguar se nuk janë kompetent për këtë çështje.
“Referuar kërkesës suaj, lidhur me çështjen e masës së sigurisë, ju njoftojmë se e njëjta është zgjidhur nga Gjykata e Apelit, më 9 tetor 2024 dhe është ekspeduar në Gjykatën Themelore në Prishtinë, andaj ju lusim t’i drejtoheni kësaj gjykate për çfarëdo informacioni të mëtutjeshëm”, thuhet nga Gjykata e Apelit.
Por Gjykata Themelore në Prishtinë, përkundër pritjes për më shumë se tri javë, nuk ka kthyer përgjigje për këtë proces.
E avokati i paditëses, ka kërkuar nga Prokuroria që të intervistohet edhe pronari që dyshohet se është i kundërligjshëm i kësaj parcele.
“Ju njoftojmë se lënda është pranuar në Prokurorinë Themelore në Prishtinë, e njëjta i është ndarë për trajtim te prokurori i çështjes në përputhje me rregulloren e brendshme për ndarjen e lëndëve, kurse lënda është duke u analizuar me kujdes nga ana e prokurorit të çështjes dhe brenda afateve ligjore do të ndërmerren të gjitha veprimet e nevojshme”, thuhet nga Prokuroria Themelore në Prishtinë.
Televizioni ka tentuar të marrë një qëndrim edhe nga personi i paditur, mirëpo përmes avokatit të tij, nuk ka pranuar të flasë para kamerës.
As nga Inspekcioni në Fushë-Kosovë nuk kanë pranuar të tregojnë se pse nuk është marrë parasysh kërkesa e paditëses për të dalë në terren për ndalimin e këtyre punimeve.
