Gjykata Themelore në Gjakovë ka shpallur dënim me 7 vjet burgim ndaj të pandehurit K. P., për veprën penale “Rrezikimi i trafikut publik” që rezultoi me fatalitet.
Vendimi u mor nga gjyqtari Samedin Cena në Departamentin e Përgjithshëm, ka njoftuar Gjykata Themelore e Gjakovës, raporton Betimi për Drejtësi.
Sipas aktakuzës, më 30 qershor 2022 rreth orës 12:05 në lagjen Dardania në Gjakovë, K. P. duke drejtuar automjetin Volkswagen Golf, kreu kthim të pasigurt nga e djathta në të majtë përball marketit “E.”, duke i marrë përparësinë ambulancës së QKMF-së në Gjakovë, e cila vinte me drita vezulluese dhe alarm. Për pasojë, autoambulanca goditi automjetin e tij, që më pas u përplas me makina të tjera, duke shkaktuar rrokullisje dhe dëme të mëdha materiale.
Si rezultat tragjik, në aksident humbën jetën S. Gj. më 1 korrik 2022 dhe M. S. më 5 korrik 2022. Në autoambulancë mbetën të lënduar rëndë A. A., Z. D. dhe F. B., të cilët morën trajtim mjekësor sipas ekspertizës.
Gjykata vendosi gjithashtu dënim plotësues për të pandehurin: ndalim për drejtimin e automjetit për 3 vite pas vuajtjes së dënimit me burg. Koha e kaluar në paraburgim nga 30 qershori 2022 deri më 21 nëntor 2023 i llogaritet në dënim.
K. P. u obligua të paguajë edhe shpenzimet e procedurës në shumën 1700 euro. Për kërkesat pasurore juridike të dëmtuarve, palët janë udhëzuar të vazhdojnë kontestin në rrugë civile.
Palët kanë të drejtë ankese në 30 ditë nga marrja e aktgjykimit me shkrim.
