Po del nga banesa e tij për t’u nisur sheshit të kryeqytetit.
67-vjeçari, Idriz Pllana nga Prishtina po ia mësyn pikës në të cilën sot takohen dhuruesit e gjakut.
Ai ka treguar se është dhurues aktiv i gjakut që nga viti 1970, dhe kësisoj për të sot është hera e 132-të që ai dhuron gjak.
“Arsyeja pse dhuroj gjak është më së paku në aspektin njerëzor, fetar, kombëtar të shpëtosh jetë, ‘dhuro gjak shpëto jetë’. Unë iu uroj ditën e dhurimit të gjakut në të gjithë botën dhe veçanërisht shqiptarëve të mi, është hera e 132 që po dhuroj gjak dhe kurrë nuk jam pishman që dhuroj gjak”, tha Pllana.
Përveç që kujdesen për rendin dhe sigurinë, pjesëtarë të Policisë së Kosovës sot bënë edhe një vepër tjetër humane.
Në shenjë humaniteti, disa prej tyre sot dhuruan gjak.
Se kishte interesim të madh për të dhuruar gjak, e thotë edhe drejtoresha e Transfuzionit të Gjakut, Bukurie Zhubi.
“Interesimi ka qenë shumë i madh për dhurim të gjakut, kërkesat kanë qenë të shumta dhe nuk kemi arrit të gjitha me i realizu gjatë kësaj jave, një përqindje e mirë e tyre ka mbet me u realizu gjatë ditëve në vijim”m tha Zhubi.
Ndryshe, kjo ditë shënohet qysh prej vitit 2004 dhe ka për qëllim dhurimin e gjakut për të shpëtuar jetën e atyre në nevojë.
Raporti i gazetares Lendrina Kodrolli.
