Gjykata Themelore në Prishtinë, ka shpallur aktgjykim dënues ndaj të akuzuarit Petrit Tufa, duke e dënuar me 2 mijë euro gjobë dhe 6 muaj burgim për veprën penale “Keqpërdorim dhe mashtrim në prokurim publik”.
Aktgjykimi ndaj të akuzuarit Tufa, u shpall të mërkurën, nga kryetarja e trupit gjykues, Alltën Murseli.
Sipas aktgjykimit, i akuzuari Tufa u dënua me 2 mijë euro gjobë dhe 6 muaj burgim, por me pëlqimin e tij, dënimi me burgim mund t’i zëvendësohet me 3 mijë euro gjobë.
“Nëse pajtoheni, dënimi me burg prej 6 muaj, mundeni me dhënë pëlqimin, nëse doni me u kthy në gjobë. Nëse pajtoheni, e bëni kërkesën në gjykatë edhe e dorëzoni”, tha gjykatësja.
Sipas aktgjykimit, gjykatësja Murseli tha se akuzuari obligohet që t’i paguajë edhe shpenzimet e procedurës penale në shumë prej 100 euro në emër të paushallit gjyqësor si dhe 50 euro për fondin e viktimave të krimit.
Sipas gjykatëses, pala e pakënaqur ndaj këtij vendimi ka të drejtë ankese në afat prej 30 ditësh, raporton “Betimi për Drejtësi”.
Ndryshe, e akuzuar në këtë rast për veprën penale “Falsifikimi i dokumenteve”, ka qenë edhe Qëndresa Foniqi, e cila pasi që më 28 tetor 2022 e ka pranuar fajësinë, ishte dënuar me 4 mijë euro gjobë.
Sipas aktakuzës së ngritur nga Prokuroria Themelore në Prishtinë, i pandehuri Petrit Tufa si pronar i kompanisë “Triomed.CO sh.p.k” me vetëdije ka shkelur rregullat e prokurimit publik, në atë mënyrë që më 16 qershor 2022 në zyrën e prokurimit në Policinë e Kosovës në Prishtinë, ka dorëzuar ofertën për të marrë pjesë në aktivitetin e prokurimit me titull “Furnizimi me materiale shpenzuese për vendin e ngjarjes” , ku me qëllim mashtrimi në mesin e dokumentacionit, ka dorëzuar dokumentin e falsifikuar “vërtetimi tatimor”, të 5 prillit 2022, i cili dokument me numër të njëjtë identifikues është nxjerrë më 27 janar 2022, me qëllim të aplikimit për kredi.
Me këto veprime, Tufa akuzohej se ka kryer veprën penale “Keqpërdorimi dhe mashtrimi në prokurim publik” nga neni 415, par.1 të Kodit Penal të Republikës së Kosovës.
Sipas aktakuzës, e pandehura Qëndresa Foniqi, përgjegjëse e kontabilitetit në kompaninë “SHFK-SHPK”, e angazhuar nga kompania “Triomed.CO.shpk”, thuhet se ka falsifikuar dokumentin “vërtetimi tatimor”, i 5 prillit 2022, në atë mënyrë që vërtetimit tatimor i ka ndryshuar përmbajtjen nga vërtetimi tatimor për kredi, i 27 janarit 2022, në vërtetim tatimor për tender të datës 5 prill 2022, me qëllim që kompania “Triomed.CO.shpk” të aplikojë për tender në aktivitetin e prokurimit me titull “Furnizimi me materiale shpenzuese për vendin e ngjarjes”.
Me këto veprime, Foniqi ngarkohej se ka kryer veprën penale “Falsifikimi i dokumenteve” nga neni 390 paragraf 1, të Kodit Penal të Republikës së Kosovës.
