Aleanca për Ardhmërinë e Kosovës, ka kritikuar Qeverinë dhe kryeministrin Kurti, për mos reagim ndaj kërcënimit që i ka bërë ministri serb i mbrojtjes, Millosh Vuçeviq, Maqedonisë Veriore dhe Malit të Zi për njohjen e pavarësisë së Kosovës.
Shefi i Grupit Paralamnetar të AAK-së, Besnik Tahiri, tha se qëndrimet e Serbisë kundër shtetit të Kosovës nuk janë befasi, por sipas tij është e çuditshme mos reagimi i Qeverisë dhe kryeministrit.
Ai të martën në një konferencë për media tha se kjo tregon paaftësinë e Qeverisë për të adresu temat që lidhen me sovranitetin e shtetit të Kosovës, raporton teve1.info
“Neve na befason skajshmërisht neglizhenca e Qeverisë së Kosovës, e kryeministrit ndaj këtyre deklaratave, sepse në atë deklaratë po kontestohet Pavarësia e Kosovës. Po ka reagim nga kryeministri i Shqipërisë, e s’po ka nga kryeministri i Kosovës nuk ka logjikë kjo. Tregon për një paaftësi të Qeverisë për të adresu temat që lidhen me sovranitetin e shtetit të Kosovës”, tha Tahiri.
Millosh Vuçeviq, tha se Mali i Zi e Maqedonia do të goditen sikur Ukraina, pasi që e kanë njohur pavarësinë e Kosovës.
Ndaj këtyre deklaratave ka reaguar presidenti i Malit të Zi, ministri në detyrë i Punëve të Jashtme të Maqedonisë, por edhe kryeministri i Shqipërisë Edi Rama.
