Kryeministri Albin Kurti ka pritur në takim përfaqësuesit e posaçëm të Norvegjisë dhe Sllovenisë për Ballkanin Perëndimor, Arne Bjørnstad dhe Anžej Frangeš, të shoqëruar nga ambasadorët përkatës në Kosovë, Jens Grøndahl dhe Minca Benedejčič.
Siç bëhet e ditur në komunikatë, temë diskutimi veç tjerash ishte takimi i 18 marsit në Ohër të Maqedonisë së Veriut, në kuadër të dialogut.
“U diskutua edhe për raportet me Serbinë, për takimin e radhës të 18 marsit në Ohër, ku do të diskutohet plani i zbatimit të propozimit të BE-së për marrëveshje bazë, si dhe për pritjet nga ai takim”, ka njoftuar Zyra e Kryeministrit.
Emisarët njoftohet se dhanë mbështetjen e tyre për këtë takim dhe procesin e dialogut.
“Ata theksuan rëndësinë e këtij takimi si mundësi unike për avancimin e marrëdhënieve ndërmjet dy shteteve drejt normalizimit të plotë të raporteve dhe kontributin që ka për paqen dhe sigurinë në rajon”, njofton ZKM.
Bashkëpunimi i ndërsjellët, integrimi evropian i Republikës së Kosovës dhe Ballkanit Perëndimor si dhe sfidat e përbashkëta të kontinentit evropian ishin po ashtu çështje të bashkëbisedimit, njoftohet tutje.
