Ministria e Punëve të Brendshme ka njoftuar se gjatë muajve qershor dhe korrik të këtij viti janë raportuar 55 raste të të shtënave festive në Kosovë.
Sipas ministrisë, në kuadër të fushatës “Festo me zemër, jo me armë”, Policia e Kosovës ka ndërmarrë veprimet e nevojshme në të gjitha rastet e raportuara.
Si rezultat, 48 persona janë shoqëruar nga Policia, ndërsa janë konfiskuar gjithsej 47 armë zjarri.
“Vetëm gjatë muajve qershor dhe korrik të këtij viti, 55 qytetarë të Republikës së Kosovës kanë raportuar për të shtëna festive. Në të gjitha rastet e raportuara, Policia e Kosovës ka ndërmarrë të gjitha veprimet e nevojshme, duke shoqëruar 48 persona dhe duke konfiskuar gjithsej 47 armë zjarri”, thuhet në njoftimit të Ministrisë së Punëve të Brendshme.
MPB-ja ka falënderuar qytetarët që kanë raportuar rastet dhe i ka inkurajuar që të vazhdojnë të raportojnë keqpërdorimin e armëve, me qëllim të parandalimit të të shtënave gjatë dasmave dhe ahengjeve familjare.
