Grupi ushtarak jemenas, Huthi kanë thënë se ka pasur sulme të reja amerikane kundër tyre, që këtë herë kanë lënë të vdekur 53 njerëz, përfshirë këtu edhe pesë fëmijë.
Sipas Huthëve, objektivat në zonat Al Jaouf dhe Hudaydah u goditën herët të hënën, ndërsa Komanda Qendrore e SHBA tha se forcat e saj kishin vazhduar operacionet.
SHBA-ja nisi të shtunën atë që e quajti një valë “vendimtare dhe të fuqishme” sulmesh ajrore ndaj objektivave të Huthëve, si pjesë e përpjekjeve për të ndaluar sulmet e tyre ndaj anijeve në Detin e Kuq.
Uashingtoni thotë se disa figura kyçe të Huthëve janë në mesin e të vdekurve, por grupi nuk e ka konfirmuar këtë.
Duke përditësuar numrin e mëparshëm të të vdekurve, zëdhënësi i ministrisë së shëndetësisë së Huthëve, Anis al-Asbahi, postoi në X se 53 persona ishin vrarë duke përfshirë “pesë fëmijë dhe dy gra”, dhe se 98 persona të tjerë ishin plagosur.
Një baba i dy fëmijëve, me emrin Ahmed, i tha agjencisë së lajmeve AFP: “Unë jetoj në Sanaa për 10 vjet, duke dëgjuar granatime gjatë gjithë luftës. Për Zotin, nuk kam përjetuar kurrë diçka të tillë më parë.”
Sekretari amerikan i Mbrojtjes, Pete Hegseth u zotua për një fushatë raketore “të paepur” derisa Huthitë të ndalojnë sulmet.
Huthitë thanë se do të vazhdojnë të synojnë anijet e Detit të Kuq derisa Izraeli të heqë bllokadën e Gazës dhe se forcat e tij do t’i përgjigjen sulmeve.
