Policia e Kosovës, përmes Drejtorisë për Hetimin e Krimit të Organizuar dhe Krimeve të Rënda, në bashkëpunim me Prokurorinë Themelore në Mitrovicë, ka dhënë detaje të reja lidhur me një seri operacionesh të koordinuara në disa komuna të vendit, duke goditur aktivitetet e kundërligjshme që lidhen me skemat piramidale dhe bixhozin e paligjshëm.
Operacionet janë shtrirë në rajonin e Mitrovicës, Vushtrrisë, Istogut dhe Skenderajt, ku janë kontrolluar rreth 50 lokacione të ndryshme, përfshirë biznese dhe shtëpi private të dyshuara për përfshirje në këto veprimtari.
Sipas të dhënave zyrtare, gjatë aksionit janë arrestuar gjithsej 34 persona të dyshuar. Me vendim të prokurorit, 29 prej tyre janë dërguar në mbajtje, ndërsa të tjerët janë liruar në procedurë të rregullt.
Gjatë bastisjeve, autoritetet kanë sekuestruar një sasi të konsiderueshme provash materiale, përfshirë rreth 170 mijë euro para të gatshme, pesë automjete, armë zjarri, si dhe pajisje të ndryshme që dyshohet se janë përdorur për zhvillimin e aktiviteteve të paligjshme.
Veprime shtesë janë ndërmarrë edhe nga njësitë rajonale të hetimeve dhe stacionet policore përkatëse. Në Skenderaj, në kuadër të këtij operacioni, janë kontrolluar 15 lokacione, janë arrestuar tetë persona, ndërsa katër prej tyre janë dërguar në mbajtje.
Autoritetet theksojnë se këto operacione përfaqësojnë një angazhim të fuqishëm institucional në luftimin e krimit të organizuar, krimeve ekonomike dhe aktiviteteve të paligjshme që cenojnë rendin juridik dhe sigurinë publike. /teve1.info/
