Rrugët e Kosovës vazhdojnë të mbesin të rrezikshme.
Vetëm gjatë kësaj jave, 5 persona humbën jetën në aksidente trafiku.
Tre nga ta ishin të rinj të moshës 23, 29 dhe 34 vjeç.
Për ekspertin e komunikacionit, Nol Dedaj, niveli i rrezikshmërisë në Kosovë është baraz me atë të Azisë.
“Në qoftë se ju e pyetni Policinë, Policia thotë që jemi më të mirët në rajon. Në qoftë se më pyetni mua, atëherë koeficienti i nivelit të rrezikshmërisë në Kosovë barazohet me Azinë. Kështu që këta edhe në qoftë se merren e marrin parasysh që krahasimi i aksidenteve bëhet në bazë të numrit të banorëve dhe numrit të automjeteve, unë po ju them këtu se nuk bëhet ajo sa e saktë, por niveli i rrezikshmërisë përcaktohet në bazë të qarkullimit, llojit të qarkullimit të automjeteve dhe se sa ka shpenzim të derivateve”, thotë Dedaj.
Po cilët janë shkaktarët e kaq shumë aksidenteve me fatalitet?
“Në bazë të hulumtimeve evropianëve, atëherë faktori njeri prin me 85% të rasteve si shkaktar i aksidentit të komunikacionit, derisa faktorë tjerë janë faktori rrugë me 8 deri 10%, pastaj faktori i automjetit 3 deri 5%, faktori komunikacioni rrugor 1% derisa dhe incidenti është 1% faktori incident. Në Kosovë nuk bëhen hulumtime të tilla prandaj edhe nuk mundemi me dhënë edhe një përqindje të tillë të këtyre pesë faktorëve të cilët unë i ceka, po megjithatë edhe këtu te ne prin faktori njeri”, shprehet eksperti i komunikacionit.
Që numri i aksidenteve të zvogëlohet, Dedaj ka një këshillë.
“Pse mos me dhënë patentë shoferin 16-vjeçar, pastaj dy vjet me qenë nën mbikëqyrje të një personi të tretë, do të thotë dy vite, pastaj me iu nënshtruar edhe poligonit të sigurisë, që ne nuk e kemi edhe poligoni i sigurisë është pragu i fundit të cilin e bën drejtuesi i automjetit të pavarur. Edhe këto institucionet tona nuk ekzistojnë domethënë, nuk janë, edhe pikërisht atëherë do të merreshim pastaj edhe pas poligonit të historisë ku bëhet i pavarur drejtuesi i automjetit, vendoset edhe kontrolli mbi të”, thotw ai.
Vetëm gjatë ditës së djeshme, sipas të dhënave të Policisë së Kosovës, në vend ndodhën 42 aksidente trafiku, derisa u shqiptuan mbi 800 gjoba.
