Raportuesja për Kosovën në Parlamentin Evropian, Viola Von Cramon ka komentuar zgjedhjet që u mbajtën të dielën në katër komunat me shumicë serbe në veri.
Von Cramon përmes një postimi në Twitter ka shprehur keqardhje për mospjesëmarrjen e Listës Serbe në zgjedhje teksa ka dënuar frikësimin e të gjithë atyre që kanë dashur të kandidojnë apo votojnë, shkruan teve1.info
“Megjithatë, më vjen thellësisht keq që forca kryesore politike në veri të Kosovës, Lista Serbe, ka refuzuar të marrë pjesë në këto zgjedhje dhe dënoj fuqishëm frikësimin e të gjithë atyre që kanë dashur të kandidojnë apo votojnë të dielën” – ka shkruar Von Cramon.
Po ashtu Von Cramon ka deklaruar se bojkoti i orkestruar nga qeveria serbe dhe frikësimi i liderëve opozitarë serbë janë të papranueshëm dhe bien ndesh me standardet demokratike.
“Pas një shtyrjeje të zgjedhjeve, bojkoti i orkestruar nga qeveria serbe në Beograd, si dhe frikësimi i liderëve politikë opozitarë serbë, janë të papranueshëm dhe bien ndesh me standardet demokratike. Retorika që vjen nga instancat më të larta të Serbisë ndaj zyrtarëve kosovarë është e mjerueshme dhe duhet të ndalet”- deklaroi ajo.
Tutje, raportuesja për Kosovën në PE, ka thënë se kthimi i përhershëm i serbëve të Kosovës në institucione duhet të lehtësohet.
“Vakumi aktual institucional dhe i sigurisë duhet të zgjidhet duke u angazhuar me komunitetin lokal në veri të Kosovës. Kthimi i përhershëm i serbëve të Kosovës në institucione duhet të lehtësohet tani dhe qeveria e Kosovës duhet ta mundësojë këtë kthim. Puna për themelimin e Asociacionit së Komunave me shumicë serbe duhet të finalizohet sa më shpejt që të jetë e mundur”, ka shkruar Von Cramon në Twitter.
My statement on the Municipal Elections which took place on 23 April in the north of #Kosovo 👇@MiroslavLajcak @EUKosovo @EULEXKosovo pic.twitter.com/3XhOh7U3vJ
— Viola von Cramon 🇺🇦🇪🇺🇮🇱 (@ViolavonCramon) April 24, 2023
Kujtojmë se pjesëmarrja në zgjedhjet e jashtëzakonshme të 23 prillit ishte 3.47 përqind./teve1.info/
