Në një vjetorin e fillimit të gjykimit ndaj ish-krerëve të Ushtrisë Çlirimtare të Kosovës, ka përfunduar dëshminë edhe ish diplomati amerikan Shaun Byrnes.
Kësisoj, Byrnes është dëshmitari i 53-të që dëgjohet në këtë rast.
Dëshminë e ish diplomatit e përmendi edhe Ismail Syla ish-këshilltar i ish-presidentit Hashim Thaçi, i cili ka thënë se mbetet optimist për lirimin e tij.
“Vitin që shkoi kemi realizu disa vizita ata janë njerëz që gjithmonë kanë kërkuar që mos te ketë ndikim se për atë të ngarkohen fare nuk kanë drojë se mund të shpallen fajtor. Kemi pasë rastin me i pa dy figura ndërkombëtare që dëshmuan në këtë gjykatë, FredAbrahams dhe ShaunByrnes dy figura dinjitoze kanë dëshmuar, se për cka ngarkohen të akuzuarit vërtetë është një aktakuzë e paqëndrueshme, shprehet Syla.
Dëshmia e ish diplomatit amerikan, ishte e hapur. Por jo të gjithë dëshmitarët paraqiten në seanca të hapura.
Andaj, avokati, Skender Musa vlerëson se ky gjykim ka zvarritje dhe mungesë të transparencës pasi shumë seanca kanë qenë të mbyllura.
“Sa i përket seancave të mbyllura, kjo është totalisht e panevojshme sepse mund të jene 2-3 dëshmitarë që kanë frikë se mund të ketë hakmarrje ndaj tyre, familjes, por jo gjithë ky numër kaq i madh i dëshmitarëve duke pasur parasysh faktin se deri më tani asnjë dëshmitarë nuk është ankuar se ndaj tij është tentuar të ndikohet”, shprehet avokati Musa.
E Amer Alija nga Fondi për të Drejtën Humanitare ka thënë se nëse vazhdohet me këtë intensitet, prokurorisë i duhen edhe 2 vite për dëshmitarët e saj.
“Kanë mbetur edhe një numër i madh i dëshmitarë të tjerë për të dëgjuar, të cilët janë të propozuar nga Prokuroria dhe nëse vazhdohet me këtë ritëm që brenda një viti të dëgjohen rreth 50 dëshmitarë, atëherë dëshmitarëve të prokurorisë do tu duhen edhe gati dy vite për tu dëgjuar”, thotë Alija.
Më 3 prill të vitit të kaluar, ka filluar gjykimi ndaj katërshes së UÇK-së, Hashim Thaçit, Kadri Veselit, Rexhep Selimit e Jakup Krasniqit, ku edhe këtë vit pritet të dëgjohen edhe një numër i madh i dëshmitarëve.
Në paraqitjet e tyre para gjykatësit të procedurës paraprake ish-krerët e UÇK-së janë deklaruar të pafajshëm për akuzat që iu ngarkohen.
Kronika e realizuar nga Gresa Bardhecaj
