Dy trafo elektrike në lagjen Arbëria në Prishtinë që një kohë qëndrojnë ta hapura. Andaj, edhe qarkullimi i shumtë i qytetarëve në këtë zonë bën që rreziku për jetë të jetë mjaft i madh.
Për këtë, banorët e kësaj lagje shprehin mllefin e tyre dhe vlerësojnë se janë të ekspozuar ndaj rrezikut, sidomos fëmijët.
Andaj kërkojnë intervenim sa më të shpejt.
Televizioni ka kërkuar për sqarime për këtë çështje edhe në Kompaninë Kosovare të Distribuimit të Energjisë.
Nga kjo e fundit mohuan se këto asete janë pronë e tyre, por që janë në kompetencë të Komunës së Prishtinës.
“Sipas fotove, të cilat na i ke dërguar përmes telefonit, këta ormana me dyer të hapura nuk janë pronë e KEDS-it, por janë pronë e ndriçimit publik, rrjedhimisht janë pronë e komunës, tek organet kompetente të së cilës ju sugjeroj që ta kërkoni përgjigjen. Ju informojmë që KEDS-i përkujdeset maksimalisht për të gjitha asetet elektroenergjetike- pronë e kompanisë, që të jenë sa më të sigurta. Ka ndodhur në raste të caktuara kur individë të papërgjegjshëm i kanë hapur dyert e trafostacioneve të KEDS-it, ndërkaq, në rast të tillë, ato mbyllen sërish në kohën më të shkurtër të mundshme”, thuhet nga KEDS.
Kurse, edhe nga niveli lokal përmes një përgjigje me shkrim për tëvë1, thanë se nuk janë përgjegjës për këtë çështje.
“I gjithë rrjeti shpërndarës dhe dollapët e njehsorëve elektrik janë asete të KEDS-it. Prandaj nuk është përgjegjësi e Kryeqytetit mirëmbajtja e stabilimenteve elektroenergjetike”, ka qenë përgjigjja nga Komuna e Prishtinës.
Përderisa, përgjegjësia për këtë çështje të mohohet nga organet kompetente, sipas banorëve kjo çështje duhet trajtuar me prioritet.