Bordi Drejtues i ShSKUK-së ka kërkuar nga drejtori i përgjithshëm i ShSKUK-së, marrjen e masa ndaj personave përgjegjës për rastin ku një pacient ka humbur jetën dhe disa të tjerë kanë pësuar lëndime, pasi një dhomë në Klinikën e Psikiatrisë, është përfshirë nga zjarri.
Mbledhja jashtëzakonshme për këtë rast sipas njoftimit është mbajtur më kërkesë të ministrit të Shëndetësisë, Arben Vitia.
“Sot, Bordi Drejtues i ShSKUK-së, me kërkesë të ministrit të Shëndetësisë, Dr. Arben Vitia, ka mbajtur mbledhje të jashtëzakonshme ku pikë e vetme e rendit të ditës ishte ngjarja e fundit e ndodhur në Klinikën e Psikiatrisë. Pas diskutimeve, Bordi Drejtues ka kërkuar nga drejtori i përgjithshëm i ShSKUK-së, konform përgjegjësive dhe autorizimeve ligjore të bëjë vlerësim të gjendjes dhe bazuar në kompetencat e tij të ndërmarrë veprimet ligjore ndaj personave përgjegjës. Po ashtu, do të ndërmerren veprime të tjera ligjore, me qëllim të parandalimit të rasteve të tilla”, thuhet në komunikatë, përcjell teve1.info
Shërbimi Spitalor, Klinik dhe Universitar i Kosovës ka konfirmuar se një pacient ka vdekur për shkak të përfshirjes nga zjarri të një dhome në klinikën e Psikiatrisë në QKUK.
ShSKUK ka thënë se rasti ka ndodhur në një nga dhomat e tipit të mbyllur.
