47 vjeç është mosha mesatare e zyrtarëve policorë në Policinë e Kosovës.
Për të ulur këtë, është kërkuar që të bëhet pensionimi i parakohshëm i tyre në moshën 55-vjeçare.
Kjo është synuar që të bëhet me qëllim që të rinohet mosha e punonjësve të Policisë por edhe efikasiteti i tyre në teren.
Sindikata e Policisë së Kosovës është shprehur se vazhdimisht kanë kërkuar jetësimin e këtij ligji, por që 26 vite nga krijimi i saj ende nuk është bërë kjo.
“Sindikata e Policisë së Kosovës në vazhdimësi ka bërë kërkesa ndaj të gjitha qeverive lidhur me ligjin për pensionimin e Policisë në moshën 55-vjeçare, duke theksuar se ky duhet të jetë një ligj i veçantë vetëm për pensionimin e Policisë. Edhe sot e kësaj dite nuk ekziston një ligj i tillë, ndërsa ai është mjaft i domosdoshëm që zyrtarët policorë të kenë të garantuar të drejtën e pensionimit në kohë”, tha kryetari i Sindikatës së Policisë së Kosovës, Avdi Hoti.
Një nga ish-eprorët e Policisë, thotë se kjo do ta rriste efikasitetin e zyrtarëve policorë në teren dhe do të ndikonte pozitivisht në punën e tyre.
“Vazhdimisht është kërku që të kemi një ligj për pensionimin e parakohshëm për arsye se mosha 55-vjeçare është mosha adekuate ku mund të dalin në pension dhe gjeneratat e vjetra të zëvendësohen me gjenerata të reja në frymë të re, profesionalizëm e teknologji më moderne, por edhe të jenë të aftë aspektin fizik e psikologjik të ballafaqohen me krime e dukuri tjera që ballafaqohen në shoqëri”, tha nënkoloneli në pension, Refki Morina.
Se çfarë po ndodhë me këtë projektligj, tëvë1 ka pyetur edhe Ministrinë e Punëve të Brendshme dhe menaxhmentin e Policisë së Kosovës.
Por, deri në publikimin e kronikës asnjëra nga këto institucione nuk i janë përgjigjur interesimit të televizionit.
Në Kuvend opozita kishte dërguar një projektligj të tillë, por që nuk ishte votuar nga partia në pushtet, Lëvizja Vetëvendosje.
