Të premten, një 45 vjeçar nga Mitrovica është qëlluar me gjashtë plumba. Si shkak i plagëve dhe gjendjes së rëndë i njëjti ka vdekur në Qendrën Klinike Universitare të Kosovës. Dëshmitarët rrëfejnë se çfarë kanë parë derisa Policia është në kërkim të autorit.
Afër tregut të gjelbër në Mitrovicë, një person u qëllua me gjashtë plumba.
E si pasojë e plagëve, 45 vjeçari ndërroi jetë në Qendrën Klinike Universitare të Kosovës.
Sipas Shërbimit Spitalor Klinik Universitar të Kosovës gjendja e tij ka qenë e rënduar.
“Zyra për informim e QKUK-së, ju konfirmon se përkundër përpjekjeve maksimale nga stafi i Klinikës Emergjente, një person i plagosur në Mitrovicë, nuk ka arritur të mbijetojë, për shkak të plagëve që ka pasur dhe gjendjes së rënduar shëndetësore!”, bwri tw ditur QKUK
E nga spitali Rajonal i Mitrovicës kanë treguar se në çfarë gjendje e kanë pranuar.
E gjithë ngjarjen e kanë parë punëtorët e lokaleve për rreth.
Reshit Musaj ka rrëfyer se si i ka dëgjuar të shtënat.
Në lidhje me këtë vrasje, nuk ka ende persona të arrestuar.
Sipas Policisë së Kosovës janë duke u zhvilluar hetimet e mëtutjeshme.
“Nga hetimet e zhvilluara në vendin e ngjarjes si dhe ekzaminimet e kryera, hetuesit policor si prova materiale kanë gjetur dhe sekuestruar gjashtë gëzhoja. Rrjedha hetimore është duke vazhduar në koordinim me prokurorin e rastit në drejtim të identifikimit dhe arrestimit të të dyshuarit dhe zbardhjes së plotë të të gjitha rrethanave që ndërlidhen me rastin e veprës penale vrasje.”, u tha nga Policia.
Motivet e këtij rasti ende nuk dihen.
