Skuadra e Inter Miamit e ka zyrtarizuar transferimin e Lionel Messit. Lajmi është zyrtarizuar nga skuadra në rrjetet sociale. Messi ka folur vetë rreth këtij transferimi.
“Doja të largohesha nga Evropa, të isha larg qendrës së vëmendjes. Mora vendimin që të shkojë tek Inter Miami. Ende asgjë nuk ka përfunduar 100%. Ka mbetur edhe disa gjëra për t’u finalizuar, por kemi vendosur që ta vazhdojmë rrugëtimin këtu. Kam pasur shumë shpresë se do të isha në gjendje të kthehesha, por pasi kalova nëpër atë situatë dhe pas largimit nga Barcelona, nuk doja të kthehesha në të njëjtën situatë, të prisja dhe të shihja se çfarë do të ndodh apo ta lija të ardhmen në duart e një personi tjetër. Pasi te Barcelona nuk pati ndryshim të situatës, doja të largohesha nga Evropa dhe të fokusohesha në familjen time”, ka thënë të mërkurën mbrëma Messi për mediumin “Mundo Deportivo”.
Ai foli nëse Sergio Busquets dhe Jordi Alba do t’i bashkoheshin atij tek Inter Miami.
“Tjetër gjë është raportuar. U tha se unë do të shkoja me Busquetsin dhe Jordin në Arabinë Saudite dhe se ne kishim planifikuar çdo gjë. Ne në asnjë moment nuk jemi pajtuar të shkonim diku së bashku. Unë kam marrë vendimin për vete dhe nuk e di se çfarë do të bëjnë ata”, ka thënë Messi.
Në rast të përmbylljes së këtij transferimi, do të ishte hera e parë që Messi do të luajë jashtë Evropës. 35-vjeçari, shtatë herë fituesi i “Topit të Artë”, e udhëhoqi Argjentinën drejt triumfit në Kupën e Botës në Katar vitin e kaluar. Me Paris Saint-Germainin në sezonin e kaluar shënoi 32 gola dhe pati 35 asistime në 75 paraqitje.
Ai debutoi te Barcelona në ekipin e parë në vitin 2004. Afër 20 vjet më vonë, i fitoi të gjitha trofetë e mundshëm në nivel klubesh. Në 853 ndeshje gjithsej, ka 704 gola dhe 300 asistime në nivel klubesh, ku i fitoi 12 tituj të ligave, katër trofe të Ligës së Kampionëve dhe 22 trofe të tjerë. Në total ka 38 trofe të fituar. Me Argjentinën ka 174 paraqitje, ndërsa ka shënuar 102 gola dhe ka regjistruar 56 asistime. Ka tri trofe të fituar me Argjentinën.
