Mbajtja e zgjedhjeve të reja në katër komunat veriore pritet të përcillet me dëme financiare. Sipas njohësve të ekonomisë shkuarja për herë të dytë në zgjedhje do të shkaktojë humbje mbi 1 milion euro buxhetit të shtetit.
Komisioni Qendror i Zgjedhjeve së shpejti mund të filloj përgatitjet për zgjedhjet e reja në veri.
E gjithë kjo, si rrjedhojë e kërkesës së ndërkombëtarëve që katër komunat veriore t’i nënshtrohen rishtas procesit zgjedhor.
E shkruaja edhe një herë në zgjedhje në Mitrovicën Veriore, Leposaviq, Zubin Putok e Zveçan, do të ketë efekte financiare.
Sipas profesorit të ekonomisë, Bashkim Mustafa, kjo mund të shkaktoj dëme buxhetit të shtetit mbi 1 milion euro.
“Çdo shpenzim i parasë publike që nuk arrin efektin e vetë është në dëm të shtetit. Shpenzimi i parasë publike pa arritur qëllimin është i dëmshëm… Shpenzimi i rreth 600 mijë eurove e nëse merret pjesëmarrje më e lartë do të kalojë vlerën mbi 1 milion është një humbje prej 1 milion e 600 mijë euro përtej planeve buxhetore. Dëmet janë më të mëdha në aspektin ekonomik dhe politike, pasi që është një indikacion jo i mirë për investitorë që dëshirojnë të investojnë në Kosovë”, thotë Mustafa.
Kurse sipas ekonomistit, Safet Gërxhaliu, mbajta e zgjedhjeve për herë të dytë brenda vitit në këtë kohë krize ekonomike do të jetë barrë për vendin.
“Në këtë kohë të inflacioni, në këtë kohë të krizës, është një kosto që e rëndon buxhetin e Kosovës. Shumë më mirë kish qenë këto para të investoheshin në projekte zhvillimore. Tani kur e kemi këtë situatë, eventualisht nëse do të shkohet në zgjedhje për herë të dytë apo edhe në zgjedhje nacional vërtetë do të jetë një barrë e madhe për shtetin. Ajo çka është me interesante nuk është vetëm dëmi financiar, por është edhe angazhim institucionale ku shumë proces po paralizohen dhe po bie perfomanca institucioneve në interes të qytetareve dhe në interes të shtetit”, thotë Gërxhaliu.
Me qëllim të shtensionimit të situatës, ditë më parë përfaqësuesi i lartë i Bashkimit Evropian Josep Borrell, ka publikuar 3 kërkesa: Zgjedhjet e reja lokale në veri; sigurimi i pjesëmarrjes së serbëve të Kosovës në zgjedhje; dhe fillimi i punës për themelimin e Asociacionit në kuadër të dialogut të lehtësuar nga BE-ja.
