Autor: Edona Kuliqi
Në mëngjesin e 19 janarit kanë filluar reshjet e para të shiut, të cilat më pas kanë sjellë vërshime në disa vende të Kosovës. Zonat të cilat më së shumti janë prekur nga reshjet e shiut janë Skenderaji, Podujeva, Istogu, Klina e Mitrovica .
Dëmet nga këto vërshime në 4 komuna, sipas vlerësimeve llogariten të jenë në vlerë afër 24 milionë euro.
Qyteti i Skenderajt është më i prekuri nga vërshimet dëmet e shkaktuara kapin vlerën e mbi 15 milionë eurove, raporton teve1.info.
Zyrtari për Marrëdhënie me Publikun nga ky qytet, Amir Lushtaku, ka bërë të ditur se Komisioni e ka vlerësuar gjendjen, dhe raportin përfundimtar do t’ia dorëzojë Kuvendit Komunal në një seancë të jashtëzakonshme, e cila pritet të mbahet të premten.
Sipas tij, pas miratimit në Kuvendin Komunal raporti do të dorëzohet në Qeverinë e Kosovës si dhe ministrive përkatëse.
Dëme nga vërshimet ka pasur edhe në qytetin e Klinës, ku nga raporti final, i cili ka përfunduar, vlera e tyre arrin në 3.8 milionë euro. Ky raport do të miratohet në seancë të jashtëzakonshme, ku pastaj sipas zyrtares për informim, Vlora Tafili, do t’i përcillet Qeverisë.
Ndërkohë, Istogu është qyteti i të cilit ekonomia i është dëmtuar 2,997,300.00 euro, kështu kanë bërë të ditur nga kjo komunë për teve1.info.
“Raporti me këtë vlerë preliminare i është dërguar qeverisë më 25 janar”, kanë njoftuar nga komuna.
Podujeva, është njëra ndër qytetet e cila listohet në pozicionin e fundit në listë, sa i përket vendeve e cila ka pësuar dëme nga vërshimet.
Zyrtarja për Informim dhe Monitorim të Mediave, Liridona Rrahmani nga kjo komunë, ka deklaruar se dëmet janë duke u përpiluar nga komisioni komunal.
Sipas saj, nga informatat e para prej inxhinierëve që kanë dalë në terren, kanë evidentuar dëme në infrastrukturën publike në vlerë prej 2 milionë eurove.
Rrahmani për teve1.info, ka treguar se dëmet e shkaktuara janë në rrugë, trotuare, ura, kalesa, kanalizim fekal dhe atmosferik, etj.
Në qytetin e Podujevës numri i kërkesave nga ana e qytetarëve për dëmet e shkaktuara në ekonomi familjare është 145. Zyrtarja ka treguar se këto familje janë vizituar nga komisioni. Tutje ajo ka shtuar se: “në bujqësi janë 96 kërkesa, ku komisoni komunal ka filluar vizitat dhe pritet t’i përfundojë deri në fund të kësaj jave, dhe në fillimin e javës së ardhshme do të kompletohet raporti i cili do të përcillet tek qeveria”.
Për dëmet e shkaktuara në Mitrovicë, teve1.info ka kontaktuar me zyrtarët e komunës, por të njëjtit nuk kanë kthyer përgjigje.
Ndërkohë, sa i përket dëmeve vetëm në ambientet arsimore në Komunën e Skenderajt janë raportuar se janë rreth gjysmë milioni euro. Kështu ka bërë të ditur kryetari i kësaj komune, Fadil Nura, dhe drejtori i Arsimit, Kastriot Duraku, gjatë një vizite në hapësirat e të tri shkollave të qytetit.
Ndërkaq, në vazhdën e veprimeve sa i përket fondit emergjent të vërshimeve totali i përgjithshëm deri më tani për Skenderaj është 302,559.71 euro.
