Ish-kryetari i Podujevës dhe degës së LDK-së në këtë komunë, Agim Veliu ka komentuar debatin ndërmjet Shpejtim Bulliqit kryetarit të Podujevës dhe Ekrem Hysenit kryetar i degës së LDK-së i zhvilluar në emisionin “InfoNata” në Tëvë 1.
Ai ka thënë se kur një ish-përfitues i LDK-së dhe një mohues i saj debatojnë, nuk mund të argumentojë asgjë.
Veliu në një postim në Facebook e ka kritikuar Hysenin për inferioritet ndaj Bulliqit, i cili e ftoi Hysenin të flasin për projekte, duke i thënë se e ka mundur në politikë.
“Kur në një përballje televizive dalin një ish përfitues i LDK-së dhe një mohues i LDK-së, aty veç debat të argumentuar nuk mund të ketë. Ndërsa kryetari mashtrues po i thoshte të vetëmashtruarit “hajde flasim për projekte se në politikë të kam mundur”, opozitari çile gur gojën. Nuk i bënte goja t’ia numëronte mëkatet kryetarit manipulator, për dy vite mashtrim të qytetarëve. Opozitari inferior, që e mori timonin e LDK në Llap si dhuratë, nuk e tha asnjë fjalë të vetme për punët e projektet e mëdha të bëra për qytetarët e Llapit gjatë qeverisjes së LDK-së për dy dekada”, ka shkruar ai në Facebook.
Veliu ka thënë me të drejtë pyesin qytetarët, aktivistët, anëtarët e simpatizantët e LDK-së çfarë deshi dhe cili ishte qëllimi i paraqitjes në një debat televiziv i kryetarit të kontrabanduar të LDK-së në Podujevë?
“Në qoftë se ka dashur ta dëshmojë edhe njëherë paaftësinë dhe inferioritetin politik përballë një mashtruesi të ardhur aksidentalisht në krye të Komunës, atëherë ia ka dalë plotësisht. Siç ia doli edhe kryetari mainpulator ta dëshmojë paturpësinë politike, duke i numëruar si sukses projektet e trashëguara nga qeverisja e LDK-së. Llapi nuk e meriton një kryetar komune që arrogancën e ka si mjet komunikimi dhe mashtrimin e manipulimin si formë qeverisjeje. As LDK-ja në Llap nuk e meriton ta udhëheq një person indiferent e inferior, që nuk guxon të flasë për sukseset e qeverisjes së partisë, të cilën mëton ta përfaqësojë”, ka shkruar Veliu.
Këtu mund ta ndiqni një pjesë të përballjes Bulliqi –Hyseni në Tëvë1
