Janë orët e para të mëngjesit të së dielës.
Por, tek stacioni i trenit në Fushë Kosovë, kanë filluar lëvizjet e para.
Është kjo pika e parë e takimit të qytetarëve nga Lugina e Preshevës, që jetojnë në këtë qytezë.
Këta të dielën në mënyrë të organizuar ia kanë mësyrë Serbisë.
Kjo për të votuar për njërën nga dy listat shqiptare, që po garojnë në zgjedhjet parlamentare dhe lokale në shtetin verior.
E që gjithçka të shkonte mirë, këtu u panë edhe pjesëtarë të Policisë së Kosovës.
Organizatori dhe kryetari i klubit “Trojet”, Bislim Musliu, tregon për hapat që do të ndiqen para nisjes.
“Këtu gjendemi në stacionin e trenit në Fushë Kosovë, i presim votuesit që të vijnë dhe prej këtu shkojmë në stacionin e autobusëve ku e bëjmë klasifikimin e votuesve për vendvotime dhe presim që një numër i konsiderueshëm të vijmë”, tha ai.
E i kënaqur me numrin e bashkëvendësve që u shfaqën këtu, nuk po shprehet një qytetar.
E dikush tjetër, thotë se shteti serbë me veprimet e fundit, po ua pamundëson votën shqiptarëve të Luginës.
Nga Fushë Kosova, autobusi me luginasit u nis për në stacionin e autobusëve në Prishtinë.
E këtu ishte bërë gati edhe një mjet tjetër i udhëtimit.
Por për këtë të fundit, nuk pati nevojë për shkak të numrit jo të madh të votuesve.
E kjo, ra në syrin e atyre që të dielën morën rrugën për në Serbi.
Pas përfundimit të procedurave, rreth 30 votues u sistemuan në njërin nga autobusët.
E para nisjes iu bë më dije që shqiptarët në këto zgjedhje garojnë me dy lista.
Në këtë formë mëngjesin e së dielës, autobusi me shqiptarët nga Lugina e Preshevës që jetojnë në Kosovë, u nis për në Serbi.
Këta do të zgjedhin mes listës së udhëhequr nga Shqip Kamberi dhe asaj të Shqiprim Arifit.