Në punë dolën zakonisht si herët e tjera.
Por për dallim nga ditët e kaluara, të martën pjesëtarët e flotës operative dhe punëtorët e Departamentit Mbështetës Operativ në Policinë e Kosovës protestuan në vendin e tyre të punës.
Kjo për shkak të pakënaqësive të krijuara ku sipas tyre me Ligjin e Pagave, u është caktuar vlerë e ulët e koeficientit.
Kryetari i Sindikatës së Policisë së Kosovës, Imer Zeqiri thotë se deri te kjo ka ardhur pas paralajmërimeve të shumta që janë bërë nga këta nëpunës.
Kryesindikalisti tregon se efektet e këtij bojkoti janë të dukshme, pasi që veturat e dëmtuara të Policisë nuk mund të servisohen derisa të plotësohen kërkesat e tyre, përpos rasteve urgjente.
Se duhet plotësuar kërkesat e këtyre punonjësve, e thotë edhe njohësi i çështjeve të sigurisë, Bedri Elezi.
Sipas tij, kjo është një tregues i problemeve që tashmë janë prezentë brenda këtij institucioni.
Punonjësit e Policisë së Kosovës që kanë protestuar janë pjesë e zyrtarëve civil në Policinë e Kosovës të cilët janë të angazhuar me servisim të veturave, elektricist e të tjerë të ngjashëm.
