Greqia nuk do të ndryshojë qëndrim sa i përket njohjes së pavarësisë së Kosovës.
Kështu ka bërë të ditur presidentja e këtij vendi Katerina Sakellaropoulou.
Ajo për mediumin serb “Politika”, tha se Greqia ndjek qasje pragmatike dhe konstruktive me Kosovën.
“Në të njëjtën kohë, Greqia, përveç qëndrimit të saj të njohur për statusin e Kosovës dhe besnike ndaj politikës së saj në Ballkanin Perëndimor, ndjek një qasje pragmatike dhe konstruktive në raport me Kosovën, e cila synon forcimin e stabilitetit si dhe një lëvizje të përgjithshme drejt integrimit në BE të të gjithë rajonit, që është qëllimi ynë strategjik”, tha ajo.
Ajo ka thënë se mbështesnin anëtarësimin e Ballkanit Perëndimor në BE.
“Ky është pozicioni që Greqia e ka mbrojtur dhe promovuar vazhdimisht për dekada. BE-ja nuk është e plotë pa Ballkanin Perëndimor”, tha Sakellaropoulou.
Vizitat e ndërsjella të udhëheqësve të Kosovës dhe Greqisë viteve të fundit janë shpeshtuar.
Greqia është në mesin e pesë vendeve të Bashkimit Evropian që nuk e ka njohur ende pavarësinë e Kosovës.
