Librin e promovoi në vitin 2022.
Por për këto dy vëllime të këtij libri, Salih Krasniqi, punoi shumë vjet.
Ish-kirurgu, arriti t’i dokumentojë krimet e forcave serbe mbi pacientët dhe personelin mjekësor shqiptar gjatë kohës së luftës.
“Diku afër 20 vjet kam grumbulluar të dhëna, duke filluar gjatë luftës dhe për shumicën e rasteve e kam informuar Qendrën Informative të Kosovës”, tregon ai.
Krasniqi thotë se ka dëshmi të shumta që vërtetojnë se shkaqet e vdekjes së pacientëve të vrarë në QKUK gjatë luftës, nuk u shkruan saktë.
“I kanë thënë që i ka shpërthyer i thati. Në realitet një infermiere që ka qenë në sallë, i ka thënë doktorit se çfarë diagnoze po ia shkruajmë. Doktori është përgjigj që nuk guxoj tjetër përveç se kinse i ka shpërthyer thati, ndërsa në realitet ka qenë lëndim i lukthit, shqyerje e lukthit”, shprehet ish- kirurgu për Tëvë1
E përmes lapsit, krimet serbe për mbi dy dekada, i dokumentoi edhe Nusret Pllana.
Ish-gazetari i luftës, thotë se libri i tij për terrorin serb mbi shqiptarë, arriti deri në Australi.
“Nuk ka libër më të promovuar në botë. Bile tri herë është futur edhe në bibliotekën botërore të kongresit amerikan, në vitin 2012, 2014 dhe vjet në vitin 2014”, shprehet Pllana.
Më libër, Serbinë për krimet po e mbanë përgjegjëse edhe shkrimtarja, Hanëmshahe Ilazi.
Kjo e fundit një libër të tërë ua kushtoi fëmijëve të vrarë në luftën e fundit në Kosovë.
“Unë librin “A vriten engjëjt?” e kam botuar me rastin e 100 vjetorin e pavarësisë së shtetit amë. Nuk jam e vetmja që kam shkruar për fëmijët e vrarë…unë kam shkruar nëpër familje, ne vendet ku janë bërë masakrat”, shprehet ajo.
Ndonëse jo më libër, i riu nga Drenasi, Esat Shala po e vazhdon mbledhjen e video-kasetave të luftës.
Në to, janë qindra orë incizime që përmbajnë krimet me mizore serbe në masakrat e luftës së fundit në Kosovë.
Madje për këtë angazhim vullnetar, i riu nga Drenasi thotë se shumë herë mori edhe kërcënime.
“Kërcënimi vetëm prej Facebookut, i sigurt nuk jam as sot, se çka posedoi unë. Na jemi njerëz që sigurinë e kemi nën zero prej shtetit të Kosovës”, tregon Shala.
Ndryshe, gjatë luftës së fundit në Kosovë, nga forcat serbe u vranë mbi 13 mijë e 500 shqiptarë.
