Presidentja e vendit, Vjosa Osmani, ka marrë pjesë në edicionin e dhjetë të “Javës së Gruas”, me temën “Barabarësia: Parakusht për Ripërtëritje të Demokracisë”, e cila është organizuar nga Instituti Kombëtar Demokratik.
“Javën e Gruas”, presidentja e cilëson një prej ngjarjeve më të rëndësishme të vitit, raporton teve1.info.
Sipas Osmanit, kjo ngjarje ka vlera të çmuara për kontributin e pashembullt në avancimin e pozitës së gruas.
“U bënë 10 vjet me ‘Javën e Gruas’, ngjarje kjo e cila ka vlera të çmuara për kontributin e pashembullt në avancimin e pozitës së gruas dhe promovimin e barazisë gjinore në jetën publike në vend”, është shprehur presidentja.
Ndër tjera ajo ka thënë se Kosova me dy gra presidente është lidere në rajon.
“Ky vullnet dhe ky përkushtim ekziston sot më shumë se kurrë. Nëse duam demokraci të fortë, atëherë nevojiten qytetarë të fuqizuar Edhe pse Republika e Kosovës është vetëm 15-vjeçare. Në 15 vjet rrugëtim, Kosova mbetet lider në rajon me dy gra presidente. Kosova është sot vendi që e ka përkushtimin e palëkundur për të avancuar barazinë ligjore në vend”.
Osmani ka thënë se kur gratë udhëheqin, rezultatet janë konkrete.
“Kur gratë udhëheqin, kur u dëgjohet zëri, rezultatet janë konkrete dhe progresi është i pashmangshëm”.
