Kjo është pamja e re e cila së shpejti do të ekspozohet gati në secilën pako të duhanit në Kosovë.
Kjo pasi sipas IKSHPK-së, kohët e fundit po bëhet shkelja e ligjit për kontrollin e duhanit.
Prandaj edhe intervenimi shtetëror në ngritjen e vetëdijes për mospirje të duhanit, do të bëhet në këtë formë.
“Kemi edhe faza kritike dhe me shkelje sistematike të ligjit sidomos në sektorin e gastronomisë dhe fatkeqësisht së fundmi edhe në fushën e reklamimit, sponzorimit dhe promovimit, një pikë e cila në të kaluarën ka qenë duke u respektuar mjaft mirë”.
Mirëpo krahas kësaj, problematike janë edhe cigaret elektronike.
Prandaj sipas këtij institucioni, ekziston mundësia e ndalimit të këtyre produkteve.
“Ajo çka është shqetësuese është vëllimi, sasia e importit të këtyre produkteve të cilat nuk kanë asnjë efekt përveç shkatërrimit sistematik të shëndetit. Është një nismë e cila duhet të përfundojë gjatë këtij viti, dhe në këtë aspekt ne do të marrim edhe përvojat e shteteve tjera dhe sa i përket cigareve elektronike do ta trajtojmë nëse këto do të ndalohen apo do të rregullohen”, tha Hoti.
Ndryshimin e këtij ligji e sheh shumë të nevojshëm edhe Kryetari i Komisionit për Shëndetësi, Bekim Haxhiu.
“Ky ligj i duhanit për shkak edhe të cigareve elektronike ka nevojë gjithësesi të ndryshohet, të mendohet në binarë ligjorë çështja e cigareve elektrike sepse pothuajse të gjitha këto cigare që konsumohen në Kosovë (cigare elektrike) janë cigare që importohen ilegalisht, nuk ka një nen apo një çështje ligjore përmes të cilit rregullohet edhe përdorimi edhe tregtimi i tyre”, ka thënë Haxhiu.
Ligji për ndalimin e pirjes së duhanit në ambiente të mbyllura u miratua në vitin 2013.
E në vitin 2023, Qeveria e Kosovës mori vendim për formimin e Këshillit Ndërministror për Kontroll të Duhanit.
