Me anë të një postimi në llogarinë e tij në Facebook, njoftoi se një aksion i madh i Policisë së Kosovës u krye me sukses në pjesën veriore të vendit.
Madje, ministri i Punëve të Brendshme, Xhelal Sveçla publikoi pamjet e arsenalit të armëve që u konfiskuan. Dhe, për këtë sukses të policëve, meritat ia dedikoi Qeverisë Kurti.
“Për 2 dekada, veriu i Kosovës ka jetuar në ilegalitet, në një rend anormal, ku kanë gjetur strehë organizatat kriminale e kriminelët e financuar nga Beogradi… Si Qeveri, gjatë 2 viteve të fundit, kemi zbuluar e bllokuar rrugët ilegale të kontrabandimit… Veriu hap pas hapi po shkon drejt normalitetit. Rendi dhe ligji nuk do të cenohet në asnjë cep të Republikës”, ka shkruar Sveçla.
Por, ky veprim i ministrit Sveçla po shihet nga ish zv.ministri i Punëve të Brendshme, Valdet Hoxha si ndërhyrje në punët operacionale të institucioneve të sigurisë.
Edhe njohësi i çështjeve të sigurisë, Bedri Elezi konsideron se një qasje e tillë është e gabuar.
Madje sipas tij, këto ndërhyrje siç i quan ai, mund të kenë efekte të ndryshme negative në punën e këtyre institucioneve.
Ministri Sveçla, por edhe kryeministri, Albin Kurti edhe më herët kanë publikuar rezultatet e arritura në aksione të mëparshme të Policisë në veri, duke u mburrur si Qeveri.
