Vërshimet e 25 qershorit i sollën dëme të mëdha familjes Gjoni.
Mobilieritë e shkatërruara e mbeturinat nga përmbytjet ende qëndrojnë në oborrin e kësaj shtëpie në Pejë.
Uji madje mbulojë podrumet e saj.
E pjesa e sipërme në të cilën jetojnë rrezikohet të shembet pas dëmtimeve të mëdha të këtij podrumi.
Madje e zonja e shtëpisë, Xufe Tahiraj- Gjoni, thotë se pavarësisht kërkesë për ndihmë, komisioni ende nuk ka dal për vlerësim të dëmeve.
Rrugët e lagjes “Asllan Qeshme” janë ende të shkatërruar nga përmbytjet.
Dëmet rreth 20 mijë euro pati edhe familja Muriqi.
Nga vërshimet u dëmtua shtëpia edhe biznesi familjar i kësaj familje, për këtë ata janë në pritje të kompensimeve.
Rreth këtyre vërshimeve ku edhe humbën jetën dy persona, prokuroria edhe ka nisur hetimet.
“Prokurori i rastit e ka autorizuar policinë që të mbledhë të gjitha provat lidhur me rastin. Jemi në pritje të raporteve, të cilat përcaktojnë nëse ka përgjegjësi penale dhe kush ka përgjegjësi penale”, thotë Shkodran Nikçi, zëdhënës i Prokurorisë.
E për këtë çështje, nga Komuna e Pejës, po shprehen të habitur, pasi vlerësojnë se asnjëherë nuk ka ndodhur që për fatkeqësi natyrore të zhvillohen hetime.
“Përmes mediave e kemi pa, nuk kam parë më herët që për fatkeqësi natyrore të bëhen hetime, këtu na kanë bo shumë regjisore, ja kemi hup vlerën regjisorëve të cilët kanë kryer shkollë për këtë punë, se janë tu bo shumë filma, por ne jemi të hapur për çdo gjë”, thotë Faik Zekaj- zëdhënës i Komunës së Pejës.
Zekaj ka bërë të ditur se deri më tani është përfunduar 90% e vlerësimit.
E shifra e dëmeve nga vërshimet ka arritur në mbi 1 milionë.
Dyert e familjes Ademaj në të cilën humbën jetën 26 vjeçarja dhe djali i saj 5 vjeçari ishin mbyllur.
Për shkak se shtëpia e tyre është bërë e pabanueshme sipas fqinjëve ata janë vendosur tek një i afërm i tyre.
