Kjo parti të enjten bëri kërkesë për debat parlamentar për uljen e akcizës dhe TVSh-së për këto produkte.
Anëtari i kryesisë së LDK-së, Besian Mustafa në një konferencë për media, theksoi se çmimi i naftës sot ka arritur mbi 1.80 cent dhe po shkon drejt 1.90 cent.
Sipas tij, kjo është shqetësuese pasi që qeveria po “vjelë” 60 cent për çdo litër naftë nga qytetarët.
“Tanimë janë bërë disa muaj që qytetarët po përballen me rritje enorme të çmimeve. U kemi dhënë propozime konkrete për energjinë të cilat nuk u përfillen dhe krijuan kaos e katrahurë. Kemi kërkuar uljen e akcizës në derivate, ndërsa Qeveria nuk pati guxim të ndërmerrte asnjë veprim. Qeveria nga çmimet e larta po vjelë tatime. Nëse për një periudhë të caktuar do të largoheshin TVSH-ja dhe akciza, nafta do të ishte 1.20 euro litri. Kjo qeveri po i merr 60 centë për çdo litër naftë. Teksa çmimet po rriten vazhdimisht, qeveria në bishtë të aeroplanit, nga salla në sallë duke ligjëruar mbi internacionalen socialiste. Qeveria po pasuron vetveten, duke varfëruar qytetarët”, tha ai.
Ndërkaq, Sibel Halimi, ka thënë se 95 ditë më parë i kanë propozuar Qeverisë reduktimin e TVSH-së dhe akcizën e naftës, por që shton se u injoruan.
“Jemi vendi më i varfër, me çmimet e naftës më të larta e dhjetëra produkteve bazike. Qeveria po e luan rolin e spektatorit, duke vëzhguar nga larg se si qytetarët po ballafaqohen e papërballueshmërinë e çmimeve. LDK-ja më 7 mars, 95 ditë më parë, propozoi reduktimin e TVSH-së dhe akcizës së naftës. U injoruam nga Qeveria, me arsyetimin se kjo krizë është në të gjithë Evropën. Por Qeveria jonë është e vetmja që nuk ka marrë asnjë masë për të stabilizuar çmimin”, ka thënë Halimi./teve1.info/
