Kryeministri i vendit, Albin Kurti, ka thënë se Serbia ende vazhdon t’i mohojë krimet e kryera gjatë luftës në Kosovë.
Kurti ka përkujtuar 31 marsin 1999, ku në shtëpinë e familjes Kumnova në Gjakovë, forcat serbe rrëmbyen dhe vranë Albion Kumanovën, Artan Efendija, Gëzim Devën, Lutfi Bunjakun, Bekim Bunjakun dhe Shkëlqen Binishi.
Më tej, ai ka shkruar se Serbia u ka rrëmbyer edhe kufomat, në përpjekje për të fshehur gjurmët e krimit.
“Ende mungon pranimi i së vërtetës nga Serbia dhe drejtësia për krimet e kryera gjatë luftës në Kosovë. Si Qeveri e Republikës së Kosovës, ritheksojmë zotimin tonë për të mos reshtur së kërkuari ndriçimin e së vërtetës dhe drejtësi për krimet e luftës. Pasi i rrëmbyen, ata i vranë dhe i zhdukën. Serbia ua rrëmbeu edhe kufomat, në përpjekje për të fshehur gjurmët e krimit. Në vitin 2011, trupat e tyre u gjetën në Batajnicë në periferi të Beogradit. Mes tyre nuk ishte Albioni. Albioni ishte 21-vjeç. Sot bëhen 25 vjet nga zhdukja e tij. Ҫerek-shekulli pritje e përpjekje për të vërtetën për të zhdukurit me dhunë nga Serbia”, ka shkruar Kurti në Facebook.
Në përfundim, kryeministri ka deklaruar se Kosova nderon sakrificën për lirinë e shtetit.
“Sot, në këtë përvjetor, duke përkujtuar të birin e vetëm të familjes Kumnova, kujtojmë më të dashurit e familjeve të shumta të popullit tonë të cilët u rrëmbyen e zhdukën me dhunë nga regjimi gjenocidal i Millosheviqit. Nderojmë sakrificën për shtetin tonë të lirë. Qëndresa e Nënës Nesrete dhe Bacës Muharrem Kumnova na mbanë të fortë të gjithëve,” ka përfunduar Kurti./teve1.info/.
