Kryeministri i Kosovës, Albin Kurti ka njoftuar ambasadorët e akredituar në Kosovë për takimin e 18 marsit në Ohër, ku Kosova dhe Serbia u dakorduan për aneksin e zbatimit të Planit Evropian.
Në takimin e së hënës me diplomatët që u bë me ftesë të kryeministrit, Kurti tha se pala kosovare ka qenë konstruktive me oferta e propozime që u refuzuan nga pala serbe që po ashtu refuzoi nënshkrimin e marrëveshjes sikurse më 27 shkurt.
“Kryeministri Kurti theksoi se delegacioni i Republikës së Kosovës kanë qenë maksimalisht të përkushtuar dhe konstruktiv, por edhe kreativ me oferta e propozime që u refuzuan nga pala tjetër, e cila, sikurse në Bruksel me 27 shkurt, përsëri refuzon të nënshkruajë”,ka thënë Kurti, thuhet në komunikatën e Qeverisë, përcjell teve1.info.
Në këtë takim është diskutuar edhe për anëtarësimin e Kosovës në Këshillin e Evropës dhe në Bashkimin Evropian.
Sipas Qeverisë, Kosova ka numrin e nevojshëm për anëtarësim në Këshillin e Evropës .
“Sa i përket anëtarësimit në Këshillin e Evropës, Kosova tashmë ka numrin e nevojshëm të votave të shteteve anëtare, ndërkohë që departamenti ligjor i Këshillit ka konfirmuar se nuk ka asnjë pengesë juridike për anëtarësimin e plotë të Republikës së Kosovës në këtë organizatë të rëndësishme”,thuhet në komunikatë.
Pas takimit me Kurtin dhe ambasadorët e akredituar në Kosovë, është deklaruar edhe ambasadori amerikan në Kosovë.
Hovenier ka thënë se presin nga Kurti që të punojë më SHBA-në për zbatimin e Asociacionit./teve1.info/
