Në konferencën e përbashkët për medie pas mbledhjes së dy qeverive të mbajtur të hënën në Prishtinë, ata kanë shprehur qëndrimet e tyre sa i përket kësaj nisme në Ballkan.
Por Kurti e Rama janë shprehur se bashkëpunimin ndërmjet dy vendeve do ta vazhdojnë në të mirë të qytetarëve.
“Marrëdhëniet tona bilaterale janë të shkëlqyeshme dhe vëllazërore dhe vëllezërit nuk kanë ndërmjetësues në mes njeri- tjetrit. Prandaj edhe mbledhja e këtillë është në mes Shqipërisë dhe Kosovës, Kosovës dhe Shqipërisë që t’i forcojmë dy shtetet tona në funksion të qytetarëve tanë. Për çështjen e ngritur (Ballkani i Hapur) është e një dimensioni tjetër jo bilaterale, jo midis Kosovës dhe Shqipërisë dhe për atë nuk kam asgjë të re të ju them”, tha kryeministri i Kosovës, Albin Kurti.
Se raportet me Kosovën nuk do të ndryshojnë për shkak të Ballkanit të Hapur, e tha edhe kryeministri i Shqipërisë, Edi Rama.
“Është e vërtetë që Ballkani i Hapur nuk na bashkon, por është e vërtetë që Ballkani i Hapur nuk na ndanë, që do të thotë se në këtë pikë kemi këndvështrime të ndryshme, nuk është sekret, por këto nuk na pengojnë që bashkërisht të ecim përpara”, tha Rama.
Nisma Ballkani i Hapur e nisur nga Serbia, Shqipëria, Maqedonia Veriore, së fundi është përkrahur edhe nga SHBA, e cila ka thënë se duhet të marrin pjesë të gjitha vendet e Ballkanit Perëndimor.
Ndërsa, që në samitin e fundit të kësaj nisme të mbajtur në Shkup, si vëzhgues kanë marrë pjesë e dhe Mali i Zi e Bosnja, të cilat deri tash bashkë me Kosovën e kishin kundërshtuar./teve1.info/
