Qeveria e Kosovës ka konfirmuar vizitën e të dërguarit të Posaçëm të BE-së për dialogun Kosovë-Serbi, Miroslav Lajçak të hënën.
Zëdhënësi i Qeverisë së Kosovës, Përparim Kryeziu, ka thënë për teve1.info se Kurti bashkë me Bislimin do të zhvillojnë një drekë pune të hënën.
“Nesër, kryeministri Kurti bashkë me zëvendëskryeministrin Bislimi priten të zhvillojnë një drekë punë me emisarin Lajcak”, ka thënë ai për teve1.info.
Lajçak do të vizitojë Kosovën pak ditë pasi Kurti bëri publike 6 kushtet e tij për konsiderim të themelimit të Asociacionit të Komunave me shumicë serbe.
Lajçak ka qenë në Kosovë edhe më 26 janar, ku ka zhvilluar një takim me Kurtin dhe Bislimin.
Ai pas këtij takimi kishte thënë se janë dakorduar që të gjitha marrëveshjet e arritura duhet të zbatohen.
Vizitat e zyrtarëve të BE-së dhe atyre nga SHBA në Kosovë, kohëve të fundit janë shpeshtuar të cilat si qëllim kanë avancimin në procesin e dialogut dhe arritjen e një marrëveshje sipas planit franko-gjerman i cili është mbështetur edhe nga 27 vendet e BE-së por edhe SHBA.
