Eksperti i Politikave të Sigurisë dhe Gjeopolitikës, Ilir Kulla ka thënë se shtetet si Rusia dhe Kina nuk e masin njësinë e tyre nëpërmjet zgjedhjeve, ashtu siç ndodh në vendet e Bashkimit Evropian .
Kulla në emisionin “Matrix” në Tëvë1, tha se mbajtja e zgjedhjeve herë pas here na dërgon në nivele të larta të qeverisjes botërore dhe personazhe qesharake, duke aluduar në rastin e Italisë dhe ministrit të Jashtëm Luigi Di Maio.
“Kur filloi lufta në Ukrainë që kishim një lloj emocioni global antirus, Lavrovi ka thënë një gjë Rusia ka kohë. Pra ata edhe Kina, sidomos Kina, ato janë vende që nuk e masin njësinë e tyre nëpërmjet zgjedhjeve siç e kemi ne qeveritë tona rrijnë katër vite, pesë vite ato e kanë njësinë matëse … Herë pas here na çon në nivele shumë të larta të qeverisjes botërore dhe personazhe qesharake. Për shembull ke rastin e fundit të Italisë që e kishte Luigi Di Maio që u bë edhe ministër i Jashtëm, i cili deri para dhjetë vitesh shiste panine dhe sanduiqe në stadiumin e Napolit, pastaj u fut në politike se e zgjodhi populli. Pra populizmi i skajshëm dhe sot Luigji Di Majo është i dërguari special i Bashkimit Evropian për Gjirin Persik. Është një personazh që nuk ka kulturën e nevojshme, nuk njeh gjuhët, nuk ka eksperiencë, nuk ka edhe moshën dhe kështu ke personazhe të shumta të cilat e kanë bërë pra mungesën e seriozitetit”, tha ai.
Më tej, Kulla tha se Bashkimi Evropian fillimisht lindi si nevojë e kundërpërgjigjes ndaj Bllokut Sovjetik, derisa pas rënies së komunizmit si nevojë për të pasur një komunitet shtetesh me parime, ligje e bashkëpunim.
“Ta themi të vërtetën çfarë është Bashkimi Evropian sot. Është një konfederatë shumë e madhe, pra Bashkimi Evropian lindi për të qenë konfederata tjetër në qoftë se në kontinentin amerikan konfederata ishte ShBA-ja e krijuar me luftën e famshme civile në shekullin e 17-të, këtu duhej të ishte Bashkimi Evropian i cili u krijua si nevojë në fillim e kundërpërgjigjes ndaj Bllokut Sovjetik dhe pastaj pas rënies së komunizmit si nevojë për të pasur një komunitet shtetesh bashkë ku do të ndikonte parimet, ligji, forca shteti i së drejtës, bashkëpunimi”, shtoi Kulla./teve1.info./
