Në më pak se dy orë, 25 vjet më parë u vranë civilë të paarmatosur nga ushtria e rregullt serbe.
Ky krim, është një prej më të rëndëve që ndodhi gjatë luftës në Kosovë.
Madje, kjo masakër krahasohet me atë të Srebrenicës.
Andaj, për të kujtuar e nderuar të rënët krerët e shtetit u mblodhën në Akademinë përkujtimore që u organizua nga komuna në 25 vjetorin e kësaj masakre.
E para e vendit, Vjosa Osmani tha se masakrat e kryera nga Serbia janë dëshmi e fuqishme se Serbia ka kryer krime në Kosovë, kurse Kosova ka qenë viktimë.
“Këtë të vërtetë do ta mbrojmë kudo e kurdo, sepse lufta jonë ishte luftë për liri, luftë për mbrojtjen e së drejtës së dinjitetit tonë, për mbrojtjen e shtëpisë sonë siç bëri secili dëshmor, secili hero, secili luftëtar i Ushtrisë Çlirimtare të Kosovës në krye me komandantin legjendar Adem Jashari”, tha Osmani.
Para qytetarëve foli edhe kryeministri i Kosovës, Albin Kurti, i cili kërkoi drejtësi për këtë krim.
Krahas sakrificës së të rënëve e çmojmë qëndresën e popullit. I përulemi popullit të Kosovës që nuk iu përkul kurrë Serbisë. Vrasjet janë kryer nga ushtria e rregullt serbe. Dëshmitarët thonë, duke i dëgjuar në radio-lidhje thoshin se “pak është”, sa janë vrarë. Këta muaj u përkushtohemi viktimave të masakrës së Izbicës, familjes Berisha, e Korenicës”, tha Kurti.
Në këtë ceremoni mori pjesë kryetari i komunës së Vushtrrisë dhe ai i Mitrovicës, ish – kryeministri Ramush Haradinaj e shumë familjarë të dëshmorëve të rënë për liri.
