Kryetari i PDK-së, Memli Krasniqi në 25-vjetorin e masakrës së Krushës së Madhe ka kujtuar martirët e vrarë nga forcat kriminale dhe gjenocidale serbe të vitit 1999.
Krasniqi ka thënë se mungesa e tyre është një rikujtim i vazhdueshëm i dhembjes dhe mizorisë që iu shkaktua popullit të Kosovës.
“64 persona, gjyshër, baballarë, vëllezër, motra, burra, gra e fëmijë – vazhdojnë të figurojnë akoma të zhdukur – pa një varr për t’i kujtuar e për t’u vendosur lule. Mungesa e tyre është një rikujtim i vazhdueshëm i dhembjes dhe mizorisë që iu shkaktua popullit tone”, ka shkruar Krasniqi në Facebook.
Ai ka thënë se asnjë autorë nuk ka dalë para drejtësisë për këtë krim makabër.
Përderisa, Krasniqi theksoi se kjo padrejtësi, vazhdon të injoroj thirrjet dëshpëruese të familjeve të të vrarëve dhe popullit të Kosovës.
“Me gjithë kalimin e kohës, asnjë nga autorët nuk ka dalë para drejtësisë për këtë krim makabër. Kjo padrejtësi e madhe vazhdon të injoroj thirrjet dëshpëruese të familjeve të të vrarëve dhe mbarë popullit tonë. Prandaj, sot, ne jo vetëm kujtojmë martirët tanë, por jemi më të vendosur se kurrë për të kërkuar drejtësi. Asnjëherë nuk do të lejojmë që sakrificat e popullit tonë të harrohen dhe të shpërfillen”, shkroi Krasniqi./teve1.info/